Xa son moitos os profesionais da tradución que empregan ferramentas de tradución asistida. Estas ferramentas almacenan pares bilingües despois da súa correspondente tradución, xerando as xa popularmente coñecidas memorias de tradución. Estas memorias son almacéns compostos de textos orixinais nunha lingua alineados coa súa tradución noutra e esta definición coincide coa definición de corpus paralelo. Un corpus permítenos ante todo explorar unha grande cantidade de texto e identificar patróns comúns que sería imposíbel capturar mediante unha análise manual. Se este corpus conta ademais con equivalencias noutros idiomas, supón unha ferramenta de incalculábel valor no eido da tradución. Tanto é así, que os corpus paralelos poden considerarse recursos lingüísticos dun valor incluso superior aos dicionarios. Neste sentido presentamos algúns dos proxectos de corpus paralelo que xa se poden consultar en liña. Desta maneira quixéramos espertar o interese de todo aquel profesional da tradución que aínda non saiba das utilidades destes repositorios e recordarlle que estes instrumentos son recursos que poden garantir a calidade das traducións.

    Neste número, ademais de presentarlles os novos estudos orientais baseados na adquisición de competencia lingüística en chinés, coreano e xaponés, cunha orientación ante todo económica, tamén lles resumimos o resultado do Premio Internacional de Terminoloxía.

    Comité de redación:

     O CLUVI (Corpus Lingüístico da Universidade de Vigo) é un corpus textual de rexistros especializados de lingua galega contemporánea oral e escrita, elaborado polo SLI (Seminario de Lingüística Informática). No seu estado actual de desenvolvemento, os textos da sección escrita do CLUVI pertencen a catro rexistros especializados dos ámbitos xurídico-administrativo, xornalístico, informático e literario, e a tres combinacións lingüísticas co galego (monolingüe galego, tradución galego-castelán e tradución inglés-galego), e posúen unha extensión total aproximada de 4 millóns de palabras. Desde setembro de 2003, o SLI ofrece a posibilidade de consultar na web a sección de corpus paralelos do CLUVI, formada polo corpus TECTRA de textos literarios inglés-galego, o corpus LEGA de textos xurídico-administrativos galego-castelán e outros corpus paralelos menores para os pares de linguas inglés-portugués, portugués-español, inglés-español e francés-galego.

    A consulta faise a través dunha interfaz web deseñada polo SLI. Esta utilidade permite facer buscas simples e complexas (con comodíns) de palabras ailladas ou de secuencias de palabras, e observar as equivalencias bilingües dos termos pescudados nos seus contextos de uso en traducións reais e documentadas. O número de obras aliñadas e os pares de linguas dispoñíbeis na páxina web aumentan con regularidade, xa que o CLUVI é un proxecto académico de investigación en curso de grande vitalidade.

    Para máis información sobre o CLUVI escriba a Xavier Gómez Guinovart ou consulte na web do Seminario de Lingüística Informática da Universidade de Vigo.

    BancTrad é un proxecto con fins didácticos no contorno concreto da tradución e da lingüística en xeral que está sendo elaborado polo seminario de lingüística computacional da Universitat Pompeu Fabra no marco do programa de innovación docente. Trátase dunha ferramenta composta por un banco de tradución formado por textos orixinais coa súa correspondente tradución e unha interfaz de procura de acceso a través de Internet. BancTrad ofrece a posibilidade de consultar recursos recollidos en catalán, español, inglés, alemán e francés. Os textos almacenados son de diferentes fontes que representan unha gran variedade de ámbitos temáticos, tipos de documentos e rexistros de lingua.
    Posto que se accede a textos orixinais e a traducións reais, o tradutor profesional pode aplicar esta ferramenta como fonte de recursos, averiguando se xa existen traducións para determinados elementos de procura e para comprobar a fonte do autor da tradución.

    BancTrad posibilita aos seus usuarios tres modos diferentes de acceso aos corpus:

• Modo básico: procuras por secuencias de formas específicas de palabras coa posibilidade de capturar a tradución equivalente na súa lingua ou linguas de chegada
• Modo intermedio: procuras mediante filtros de forma, lema, notación morfosintácta e función sintáctica
• Modo avanzado: procuras mediante expresións regulares fornecidas pola ferramenta de explotación do corpus, a chamada CQP (Corpus Query Processor), desenvolvida na Universidade de Stuttgart no marco do proxecto CWB

    Para máis información sobre BancTrad escriba a Carme Colominas.

• CRATER: corpus paralelo sobre telecomunicacións en inglés, español e francés
• Corpus LEGEBIDUN: corpus paralelo éuscaro-español de textos xurídico-administrativos desenvolvido polo grupo DELI que lidera Joseba Abaitua da Deustuko Unibertsitatea

• Corpus do IULA: corpus en español, catalán, inglés, francés e alemán de textos non equivalentes
• Corpus CREA: corpus do español actual
• Corpus CORDE: corpus histórico do español
• Corpus PDL (Institut d’Estudis Catalans): corpus do catalán

     Este curso académico (2003-2004) comezou a nova licenciatura de segundo ciclo en Estudos de Asia Oriental, que ofrece de forma conxunta a Facultat de Traducció i d’Interpretació da Universitat Autònoma de Barcelona e a Facultat d’Humanitats da Universitat Pompeu Fabra. Asimismo, tamén se imparte na Universidad Autónoma de Madrid. Os obxectivos docentes da nova licenciatura son proporcionar a formación necesaria sobre as estruturas sociais, económicas e políticas, así como sobre os costumes, crenzas, ideoloxías, linguas e culturas da área de Asia Oriental, e preténdese que os alumnos adquiran o nivel lingüístico na lingua do seu itinerario correspondente ao nivel básico oficial de China, Xapón ou Corea.

    Estes novos estudos están relacionados co chamado Plan Marco Asia-Pacífico, froito do incipiente interese mostrado polo goberno español nos últimos tres anos. 

    Dentro deste plan inclúense entidades como a Fundación ICO (Instituto de Crédito Oficial), que publicou o Programa de Bolsas para Asia-Pacífico, e a Casa d’Àsia, que ten o obxectivo de contribuír a un maior coñecemento entre os países de Asia e Cataluña; por outra banda, fai xa anos que diversas empresas catalás dispoñen de sucursais en China, promovidas polo Consorci de Promoció Comercial de Catalunya (COPCA), adscrito ao Departament de Treball, Indústria, Comerç i Turisme da Generalitat de Catalunya.

    Polo tanto, se ben inda quedan anos para que a situación académica se equipare á do resto de países europeos no tocante ao ensino da lingua, da cultura e da tradución do chinés, o xaponés ou o coreano, si que cada vez máis se abre o abano de recursos dispoñíbeis e prevese, aínda que sexa máis por razóns económicas que por intereses culturais, que o número de expertos sobre Asia Oriental aumente nos vindeiros anos.

    O pasado luns 28 de xullo fíxose entrega do Premio Internacional de Terminoloxía 2003. A galardoada co premio foi a Dra. Judit Freixa pola súa tese La variación terminológica: análisis de la variación denominativa en textos del área de medio ambiente.

    O Premio Internacional de Terminoloxía ou ITA (International Terminology Award) concédese cada dous anos ao mellor traballo en investigación teórica ou aplicada no eido da terminoloxía. O premio estabeleceuse co obxectivo de promover a investigación e o desenvolvemento no antedito campo e para dar soporte a futuras actividades terminolóxicas.

    As teses son avaliadas polo International Terminology Awards Jury quen decide o gañador do premio tendo en conta o contido innovador dos traballos e a forma na que contribúen ao desenvolvemento teórico e aplicado da terminoloxía.